Ülviyyə Tağızadə : «Fortuna qəlbinin səsini dinləyənlərə gülümsəyir»

Bu gün “Fortunanın qonağı” rubrikamızda biz, müdrikliyi və ruhunun gücü ilə ilham verən bir xanım qonağımız haqqında danışırıq. Ülviyyə xanım Tağızadə – AWA UK (Azerbaijan Women Association in UK –BK Azərbaycan Qadınları Assosiasiyası)-nın təsisçisi, ictimai xadim və Azərbaycanın Macarıstandakı Fövqəladə və Səlahiyyətli Səfiri Tahir Tağızadənin həyat yoldaşıdır (əvvəllər Çexiya və Böyük Britaniyada səfir olub). AWA UK – xaricdəki azərbaycanlı qadınları birləşdirən və dəstəkləyən bir platformadır.
O, peşəkar həyatını, analığı və ictimai fəaliyyətini ahəngdar şəkildə uzlaşdırmağı bacarıb, öz dəyərlərinə və daxili səsinə sadiq qalıb. Bu gün Ülviyyə xanım bizimlə həyat haqqında, qadın müdrikliyi, qəlbin səsini dinləməyin və sevgi gücünə inanmağın vacibliyi barədə düşüncələrini bölüşür.
Gəlin, hər günündə gözəllik tapa bilən, bağışlamağı bacaran və dözümü ilə ilham verən bu qadının hekayəsi ilə tanış olaq.

— Əziz Ülviyə xanım, “Fortuna”ya xoş gəlmisiniz!
— Çox təşəkkür edirəm! Burada olmaq və təcrübəmi bölüşməkdən məmnunam.

— Özünüz haqqında bir az danışardınız.
— 1986-cı ildə Bakıda anadan olmuş, 47 nömrəli məktəbdə oxumuş, daha sonra Bakı Slavyan Universitetinə daxil olmuşam. Magistraturanı Beynəlxalq münasibətlər fakültəsində, çex dili ixtisası üzrə bitirmişəm – bütün bunlar mənim həyat yolumu formalaşdırdı. Xarici İşlər Nazirliyində təcrübə almağım;Mətbuat və İnformasiya İdarəsində işləməyim;şəxsi həyatımdakı dəyişiklik;Çexiyada Londonda və Budapeştə yaşamağım-bunların hamısı mənə ailəni, dostluğu və daxili harmoniyanı qiymətləndirməyi öyrətdi.

— Siz Böyük Britaniyada Azərbaycan Qadınları Assosiasiyası – AWA UK-un rəhbərisiniz. Bu təşkilat haqqında nə deyə bilərsiniz?
— AWA UK 2017-ci ildə yaradılıb ki, xaricdəki qadınları birləşdirsin, dəstəkləsin, onlara özünüifadə və inkişaf üçün platforma versin. Biz mədəni tədbirlər, sərgilər, xeyriyyə aksiyaları, təcrübə mübadiləsi görüşləri və sadəcə dostcasına toplantılar təşkil edirik. Mənim üçün AWA UK – bir uşaq kimidir: qürur və sevincim, böyüyən və ilham verən bir məhəbbət.

— Hansı tədbirlər xüsusilə yaddaqalan olub?
— Hər bir tədbir özünəməxsusdur. Amma xüsusilə “Lansdowne Private Club”-da Londonda keçirilən auksion yadımdadır – azərbaycanlı rəssam öz əsərlərini təqdim etmişdi, məşhur idmançılar isə xeyriyyə məqsədilə şəxsi əşyalarını bağışlamışdılar. Bu, həqiqətən möcüzə idi: sənət, idman və xeyirxah ürəklər bir məkanda görüşdü.

— Sizin üçün müdriklik nədir?
— Müdriklik – qəlbin səsini dinləməkdir. Qəlb deyir ki, nə vaxt hərəkət etmək, nə vaxt güzəştə getmək, nə vaxt israr etmək lazımdır. Bu, insanı həyata yönəldən daxili kompasdır.

— Bəs çətinliklərdən necə çıxmaq olar?
— İnam və həyata güvənməklə. Bəzən şəraiti idarə etmək olmur, sadəcə irəli getmək, hər vəziyyətdən dərs götürmək lazımdır. Xəyanətlər, məyusluqlar – bütün bunlar bizi gücləndirən təcrübədir.

— Həyatınızın hansı anlarını xoşbəxt hesab edirsiniz?
— Xoşbəxtlik təkcə sevincli hadisələr deyil. Xoşbəxtlik – çətinliklər arasında işığı görə bilmək, sınaqlar vasitəsilə böyümək imkanında gizlidir. Hər bir təcrübə dəyərlidir, əgər onu dərs kimi qəbul edirsənsə.

— Çətinliklərlə üzləşən qadınlara nə tövsiyə edərdiniz?
— Kömək istəməkdən çəkinməsinlər, qəlblərinə güvənsinlər, öz üzərlərində işləsinlər və daxili işıqlarını itirməsinlər. Dünya imkanlarla zəngindir və səmimiyyət həmişə cavab tapır.

— Sizin “uğur formulanız”nədir?
— Xeyirxahlıq etmək, səmimi sevmək, insanlara inanmaq. Sevgi – həyatın dolğun və mənalı olmasını təmin edən universal vasitədir.

— Özünüzə arzunuz nədir?
— Arzum odur ki, övladlarım layiqli insanlar kimi böyüsünlər, ətrafda sülh və harmoniya olsun və hər bir insan çətin anlarda belə işığı tapa bilsin.

— Oxucularımıza nə kimi tövsiyəniz var?
— Sevgi və müdrikliklə yaşayın, hər anı dəyərləndirin və xeyirxahlığın gücünə inanın. Qəlblərinizin işığı yolunuzu işıqlandırsın və başqalarına da ilham versin.

Müsahibəni apardı: Səidə Musayeva, “Fortuna” jurnalının baş redaktoru.