Tramp BBC-ni məhkəməyə verdi

ABŞ Prezidenti Donald Tramp Böyük Britaniyanın BBC korporasiyasına qarşı 5 milyard dollarlıq iddia qaldırıb.

Fortunamag.az xəbər verir ki, CNBC telekanalının məlumatına görə, iddia ərizəsində korporasiya 2024-cü il seçkilərindən bir həftə öncə yayımlanan sənədli filmdə Donald Trampın “yalan və böhtan xarakterli, alçaldıcı, təhrikedici və zərərli təsvirini” yaratmaqda ittiham olunur.

Sənəddə deyilir ki, həmin film “Prezident Trampın zərərinə olaraq seçkilərin nəticələrinə müdaxilə etmək və təsir göstərmək üçün cəhdin” bir hissəsi kimi çəkilib. Film 2021-ci il yanvarın 6-da qanunvericilərin Cozef Baydenin seçkilərdə qələbəsini təsdiqləyən zaman Donald Trampın Ağ Evdəki çıxışı zamanı tərəfdarlarını Kapitoli binasına hücuma təşviq etdiyi şəkildə redaktə olunub.

Qeyd olunur ki, sənədli film “BBC telekanalının Donald Trampın çıxışları ilə manipulyasiya etmək və onu nüfuzdan salmaq üçün məzmunu yanlış şəkildə göstərmək, o cümlədən onun heç vaxt demədiyi zorakılığa çağırış sözlərini uydurmaq kimi uzunmüddətli təcrübəsinin bir hissəsidir”.

Xatırladaq ki, Donald Trampın sözlərinin təhrif olunması ilə bağlı qalmaqaldan sonra BBC korporasiyasının baş direktoru Tim Deyvi və icraçı direktoru Debora Terness bu ilin noyabr ayında istefa veriblər.

Fortunamag.az