Serbiya ilə mədəni əməkdaşlıq məsələləri müzakirə olunub

İspaniya Krallığının Barselona şəhərində 29 sentyabr – 1 oktyabr tarixlərində UNESCO-nun Mədəniyyət Siyasətləri və Dayanıqlı İnkişaf üzrə Dünya Konfransı (MONDIACULT 2025) keçirilir. Tədbirdə mədəniyyət naziri Adil Kərimlinin rəhbərliyi ilə Azərbaycan nümayəndə heyəti də iştirak edir.

Fortunamag.az Azərbaycan Respublikasının Mədəniyyət Nazirliyinə istinadən xəbər verir ki, sentyabrın 29-da konfransın rəsmi açılış mərasimindən sonra Azərbaycan nümayəndə heyətinin bir sıra ikitərəfli görüşləri olub.
Serbiyanın mədəniyyət naziri Nikola Selakoviç ilə görüşdə nazir Adil Kərimli iki ölkə arasında mədəni əlaqələrin genişləndirilməsi üçün yaxşı imkanların olduğunu bildirib.
Serbiyalı nazir də ölkəmizlə əlaqələrin inkişafında maraqlı olduqlarını, Azərbaycanın zəngin mədəni irsi ilə daha yaxından tanış olmaq istədiklərini diqqətə çatdırıb.
Görüşdə Nikola Selakoviç Azərbaycana rəsmi səfərə dəvət olunub.

Fortunamag.az