Sabunçu Tibb Mərkəzində endoprotez əməliyyatlarının icrasına başlanıldı

Endoprotez əməliyyatları icra edən TƏBİB-in tabeliyində fəaliyyət göstərən tibb müəssisələrinin sayı 10-a çatıb. Hazırda bu əməliyyatın həyata keçirildiyi müəssisələrin sayının daha da artırılması və vətəndaşlara göstərilən tibbi xidmətlərin keyfiyyətinin yüksəldilməsi istiqamətində ardıcıl işlər davam etdirilir.

Fortunamag.az xəbər verir ki, bu gündən etibarən Sabunçu Tibb Mərkəzində də endoprotez əməliyyatlarının icrasına başlanılıb. Tibb mərkəzində ilk dəfə icra olunan endoprotez əməliyyatı uğurla başa çatıb.

66 yaşlı pasiyent üzərində həyata keçirilmiş bud-çanaq oynağının total artroplastikası (endoprotez) əməliyyatı icbari tibbi sığortanın Xidmətlər Zərfi çərçivəsində qarşılanıb.

Yıxılma nəticəsində sağ bud sümüyünün boyun sınığı diaqnozu ilə müraciət edən pasiyentə müvafiq müayinələrdən sonra sağ bud sümüyünün boynunun subkapital sınığı diaqnozu təyin olunub və cərrahi əməliyyata qərar verilib.

Əməliyyat xəstəxananın Travmatologiya-ortopediya şöbəsinin müdiri, ortoped–travmatoloq Turan İskəndərzadə tərəfindən həyata keçirilib. Əməliyyatdan sonra pasiyentə zəruri tibbi xidmətlər göstərilib. Hazırda onun müalicəsi davam etdirilir, vəziyyəti stabildir.

Qeyd edək ki, endoprotez əməliyyatı zədələnmə, degenerativ və iltihabi xəstəliklər nəticəsində oynaqlarda yaranan dəyişikliklərin konservativ müalicə metodları ilə aradan qaldırıla bilmədiyi hallarda oynaqların tam və ya qismən süni protezlə əvəz olunmasıdır.