Mühəndislər kvant siqnallarını adi internet protokolu ilə göndərdilər

Pensilvaniya Universitetinin mühəndisləri ilk dəfə kvant siqnallarını laboratoriyadan kənara çıxararaq kommersiya məqsədli fiber-optik xətlər üzərindən, adi İnternet Protokolu (IP) vasitəsilə ötürüblər.

Fortunamag.az “Science”a istinadən xəbər verir ki, araşdırmaya görə, zəif kvant siqnalları gündəlik internet trafikini daşıyan infrastrukturda uğurla işləyə bilir. Sınaq Verizon şirkətinin fiber-optik şəbəkəsində aparılıb.

Komandanın hazırladığı kiçik “Q-çip” həm kvant, həm də klassik məlumatları eyni paketlərdə birləşdirərək mövcud internet sistemi ilə uyğunlaşdırır və siqnaldakı xətaları avtomatik düzəldir.

Bu texnologiya gələcəkdə “kvant interneti”nin qurulmasına yol aça bilər. Alimlərin fikrincə, belə bir şəbəkə süni intellekti daha sürətli və enerjiyə qənaətli edə, həmçinin yeni dərman və materialların hazırlanmasında inqilabi imkanlar yarada bilər.

Fortunamag.az