Macarıstanda Müstəqilliyin Bərpası Gününə həsr olunmuş tədbir keçirilib

Macarıstanın Debrecen şəhərindəki eyni adlı universitetdə Azərbaycan Respublikasının Müstəqilliyinin Bərpası Gününə həsr edilmiş təntənəli tədbir təşkil olunub.

Fortunamag.az “AZƏRTAC”a istinadən xəbər verir ki, tədbir AYID və DUA assosiasiyaları tərəfindən Azərbaycan Diasporuna Dəstək Fondunun və Budapeşt-Azərbaycan Evinin dəstəyi ilə keçirilib.

Tədbir AYID Assosiasiyasının direktoru Fərqanə Bayramlının açılış nitqi ilə başlayıb. O, çıxışında 18 Oktyabr-Müstəqilliyin Bərpası Gününün Azərbaycan xalqının tarixindəki mühüm yerindən və bu günün dövlət müstəqilliyinin qorunması baxımından əhəmiyyətindən danışıb.

Daha sonra DUA Assosiasiyasının nümayəndələri İlham Qafarov, Nahid Bədəlli və Ömər Məmmədov çıxış edərək, Azərbaycanın müstəqilliyinin bərpası tarixini, milli həmrəyliyin rolunu və Avropada yaşayan azərbaycanlı gənclərin ölkəmizin mədəniyyətinin təbliğindəki fəaliyyətlərini diqqətə çatdırıblar.

Azərbaycanın dostlarının, qonaqların və tələbələrin də iştirak etdikləri tədbir həmrəyliyin və vətənpərvərlik ruhunun nümayişinə çevrilib.

Fortunamag.az