Leyla Bədirbəyli ərini və qızını itirdi, səhnədən uzaqlaşdı

Bu gün Xalq artisti Leyla Bədirbəylinin doğum günüdür

Azərbaycan səhnəsinin elə simaları var ki, onların adı təkcə bir sənət yolunu deyil, bütöv bir dövrün estetik yaddaşını ifadə edir. Leyla Bədirbəyli də məhz belə sənətkarlardandır. O, gözəlliyi ilə deyilən əfsanələri, istedadı ilə yazılan tarixləri bir ömrün içinə sığdıra bilmiş nadir aktrisalardandır.

Fortunamag.az bildirir ki, 1920-ci il yanvarın 8-də Bakının İçərişəhərində dünyaya göz açan Leyla Bədirbəyli uşaqlıqdan incəsənətin nəfəsini duyaraq böyüyür. Anası Bikə xanımın onu tez-tez Əli Bayramov klubundakı qadın dərnəklərinə aparması balaca Leylanın qəlbində səhnəyə qarşı sönməz bir maraq oyadır. O illərdə bu maraq sadəcə həvəs deyil, gələcək taleyin səssiz işarəsi idi.

Hələ 16 yaşı tamam olmamış Azərbaycan Dövlət Filarmoniyasında solist kimi fəaliyyətə başlayan Leyla Bədirbəyli qısa müddətdə səhnənin diqqət mərkəzinə çevrilir. Onun üçün xüsusi rəqslər qurulur, plastikası, zərifliyi və daxili enerjisi tamaşaçıları valeh edir. Lakin Leylanın istedadı yalnız rəqslə məhdudlaşmırdı. O, dramatik səhnənin də çağırışını eşidirdi.

1941-ci ildə Azərbaycan Dövlət Akademik Dram Teatrına dəvət olunması ilə Leyla Bədirbəylinin həyatında yeni və daha dərin bir mərhələ başlanır. O, səhnəyə təkcə obraz çıxarmırdı obrazla birlikdə yaşayırdı. Dezdemona, Sara, Almaz, Fəxrəndə, Solmaz kimi rollarında aktrisanın daxili məsuliyyəti və peşə etikası aydın sezilirdi. Deyilənə görə, səhnədə ölən obrazı canlandırdığı tamaşalardan sonra pərdə açıldıqda baş əyməyə çıxmaması onun sənətə nə qədər ciddi yanaşdığının bariz nümunəsidir.

Leyla Bədirbəyli üçün kino isə onu əbədiləşdirən başqa bir məkan oldu. 1945-ci ildə çəkilən “Arşın mal alan” filmində yaratdığı Gülçöhrə obrazı aktrisanın adını dünya ekranlarına çıxardı. Bu obraz təkcə gözəl bir qızın hekayəsi deyildi milli qadın zərifliyinin, daxili ləyaqətin və sevgi duyğusunun simvolu idi. Elə buna görə də Gülçöhrə Leyla Bədirbəylinin sənət taleyi ilə ayrılmaz şəkildə birləşdi.

Onun həyat yolu isə səhnə qədər parlaq, taleyi qədər də sarsıdıcı idi. Sevdiyi həyat yoldaşını və gənc yaşında qızını itirməsi Leyla Bədirbəyli üçün ağır bir sınav oldu. Bu faciələrdən sonra o, tədricən səssizliyə çəkildi, ictimai həyatdan uzaqlaşdı. Sanki səhnənin işıqları sönəndən sonra həyat da onun üçün rəngini itirmişdi.

Bütün bunlara baxmayaraq, Leyla Bədirbəyli sənət tariximizdə həmişə işıq içində qalacaq. O, sadəcə gözəl aktrisa deyildi o, səhnəyə vicdan, məsuliyyət və ruh gətirən sənətkar idi. Onun yaratdığı obrazlar bu gün də Azərbaycan mədəni yaddaşında yaşayır, yeni nəsillərə zövq, ölçü və sənət dərsi verir.

1999-cu il noyabrın 23-də Leyla Bədirbəyli bu dünyadan köçdü. Amma səhnə onu unutmadı. Çünki bəzi sənətkarlar gedir, bəziləri isə qalır. Leyla Bədirbəyli qalanlardandır.

Fortunamag.az