Kainat gözəli əslində kim imiş?

Tailandın Banqkok şəhərində keçirilən 74-cü “Kainat gözəli – 2025” müsabiqəsinin qalibi meksikalı Fatima Boş olub. Tədbirdə dünyanın müxtəlif ölkələrindən 122 iştirakçı bu titul uğrunda mübarizə aparıb.

Fortunamag.az xarici mediaya istinadla xəbər verir ki, Fatima Boşa planetin ən gözəl qadını tacını 2024-cü il “Kainat gözəli” müsabiqəsinin qalibi danimarkalı Viktoriya Teilviq təqdim edib. Birinci vitse-miss titulu isə tailandlı iştirakçıya verilib. Üçüncü, dördüncü və beşinci yerlərə müvafiq olaraq Venesuela, Filippin və Kot-d’İvuar təmsilçiləri layiq görülüblər.

“Kainat gözəli” dünyanın ən mötəbər gözəllik müsabiqəsi kimi tanınır və hər il milyonlarla tamaşaçını cəlb edir. Hər bir ölkədən iştirakçılar Təşkilat Komitəsi tərəfindən lisenziyalı milli müsabiqələr vasitəsilə seçilir. Bu il müsabiqədə 120 ölkədən nümayəndələr iştirak edib.

CNN-in məlumatına görə, final şousu amerikalı komediyaçı Stiv Birn tərəfindən aparılıb və tailandlı sənətçi Ceff Saturun musiqili kompozisiyası ilə açılıb.

Finalçılara BMT Baş Assambleyasında çıxış etsələr, hansı qlobal məsələni müzakirə edəcəkləri, habelə gənc qadınları dəstəkləmək və ruhlandırmaq üçün “Kainat gözəli” platformasından necə istifadə etməyi planlaşdırdıqları da daxil olmaqla müxtəlif suallar verilib.

Müsabiqə üç həftə davam edib və bu müddət ərzində iştirakçılar ölkəni gəzib, tədbirlərdə iştirak ediblər.

Fortunamag.az