Gənclər və idman naziri Fərid Qayibov Autizm Mərkəzində gənclərlə görüşüb

Sentyabrın 9-da Gənclər və idman naziri Fərid Qayıbov Heydər Əliyev Fondu tərəfindən inşa edilən Autizm Mərkəzində gənclərlə görüşüb.

Autizmli gənclər və sağlamlıq imkanları məhdud olan şəxslərin çalışdığı “Kaşalata” inklüziv kafedə keçirilən görüşdə nazir Fərid Qayıbov autizmli və sağlamlıq imkanları məhdud olan gənclərin həyat tərzi və əmək fəaliyyəti prosesi ilə yaxından tanış olub. “Birgə və Sağlam” İctimai Birliyinin sədri Aytən Eynalova fəaliyyətlər və layihələr barədə məlumat verib. Görüş çərçivəsində gənclər özlərinin hazırladığı şirniyyatları təqdim edib, yaradıcılıq bacarıqlarını və istedadlarını nümayiş etdiriblər.

Qeyd edək ki, Azərbaycanın ilk inklüziv kafesi olan “Kaşalata” autizmli gənclərin inklüziv mühitdə məşğulluğuna dəstək göstərmək və onların cəmiyyətə inteqrasiyasını təşviq etmək məqsədilə fəaliyyət göstərir.

Sonda gənclərə nazirliyin xatirə hədiyyələri təqdim olunub.

Fortunamag.az