Formula 1 Azərbaycan Gran-Prisi 2025-in startına az vaxt qalır

Sentyabrın 19-21-də Bakıda baş tutacaq Formula 1 Qatar Airways Azərbaycan Qran-Prisi 2025-in startına az müddət qalıb. Yarış günlərində 12 mindən artıq xarici qonağın Bakıya gələcəyi proqnozlaşdırılır. Rəsmi rəqəmlərə əsasən, ötən il tamaşaçıların 80 faizindən çoxunu əcnəbilər təşkil edib. 2024-cü ildə Azərbaycan Qran-Prisini birbaşa izləyənlərin sayı 86 milyondan artıq olub, müxtəlif platformalarda yarışı izləyənlərin ümumi auditoriyası isə 3,9 milyardı keçib.

Azərbaycan Qran-Prisinə marağın yüksək olmasını nəzərə alaraq, 2025-ci ildə əlavə iki tribuna tikilib. Mövcud 12 tribunadan 10-nun biletləri artıq tam satılıb. Ümumi tutum 20 min nəfəri geridə qoyacaq ki, bu da Bakının Formula 1 xəritəsində mövqeyini daha da gücləndirir.

Yarışa hazırlıq işlərinə minlərlə şəxs cəlb edilib. Tikinti və montaj proseslərində 2 mindən çox mühəndis, texniki işçi, quraşdırıcı və logist çalışır. Sakinlərin rahatlığı üçün bu işlər əsasən gecə vaxtlarında aparılır. Yarış həftəsində isə heyətə əlavə olaraq 1500 əməkdaş, 2000 könüllü və 1400 marşal qoşulacaq.

Fortunamag.az