DMX: 4 min 317 müraciət daxil olub

Ötən ilin 11 ayı ərzində Dövlət Miqrasiya Xidmətinə (DMX) müvəqqəti yaşamaq üçün icazənin verilməsi (uzadılması) ilə bağlı 75 min 834, daimi yaşamaq üçün icazənin verilməsi (uzadılması) ilə bağlı isə 4 min 317 müraciət daxil olub.

Bu barədə AZƏRTAC-ın sorğusuna cavab olaraq DMX-nin mətbuat xidmətindən məlumat verilib.

Bildirilib ki, DMX tərəfindən miqrasiya sahəsində göstərilən xidmətlərin keyfiyyətinin artırılması, müraciət proseslərinin sadələşdirilməsi və vətəndaş məmnunluğunun təmin edilməsi məqsədilə fəaliyyət istiqamətlərinə uyğun olaraq ölkə ərazisində müvəqqəti və daimi yaşama icazələrinin verilməsi və müddətinin uzadılması, müvəqqəti olma müddətinin uzadılması, iş icazələrinin alınması, olduğu yer üzrə qeydiyyat, vətəndaşlıq məsələləri, miqrasiya orqanlarında qulluğa qəbul və s. olmaqla ümumilikdə 27 adda elektron xidmət istifadəçilərə təqdim olunur.

“2024-cü ildə müvəqqəti yaşamaq üçün icazənin verilməsi (uzadılması) ilə bağlı 73 min 318, daimi yaşamaq üçün icazənin verilməsi (uzadılması) ilə bağlı isə 4 min 16 müraciət daxil olub”, – deyə məlumatda qeyd edilib.