Bakıda “The Central Baltic – Azerbaijan Business Forum & Gala Night” tədbiri keçirilib

21 oktyabr tarixində Bakıda “Caspian Energy Club”un təşkilatçılığı ilə “The Central Baltic – Azerbaijan Business Forum & Gala Night” adlı tədbir baş tutub. Forumun məqsədi Azərbaycan ilə Baltik dənizi regionuna daxil olan ölkələr arasında iqtisadi, investisiya və biznes əməkdaşlığını genişləndirmək olub.

Tədbirin rəsmi açılış mərasimində “Caspian Energy Club”ın sədri və qrupun baş icraçı direktoru Telman Əliyev, “Caspian Energy Club Europe”un sədri Rasim Mahmudov, Estoniya Ticarət və Sənaye Palatasının baş direktoru Mait Palts, Satakunta Tətbiqi Elmlər Universitetinin dekanı Hayki Haaparanta və Latviya Ticarət və Sənaye Palatasının İdarə Heyətinin sədri Katrina Zarina açılış nitqi ilə çıxış ediblər.

Panel müzakirələrində “Caspian Energy Club Europe”un sədri Rasim Mahmudov, estoniyalı ekspert Sven Sester, Satakunta Tətbiqi Elmlər Universitetinin dekanı Hayki Haaparanta və digər beynəlxalq nümayəndələr iştirak ediblər.

“PowerHouse Latvia” Analitika və Məsləhət Qrupunun təmsilçisi Martins Varqulis forumda moderator qismində çıxış edib. Latviya Ticarət və Sənaye Palatasının Avropa İttifaqı Layihələri Departamentinin direktoru Liqa Sıçeva isə əsas məruzə ilə çıxış edərək Baltik ölkələri və Azərbaycan arasında qarşılıqlı faydalı əməkdaşlıq imkanlarını vurğulayıb.

Forumun sonunda tərəfdaş ölkələrin nümayəndələri gələcəkdə birgə layihələrin reallaşdırılması və biznes əlaqələrinin daha da möhkəmləndirilməsi istiqamətində razılığa gəliblər.