Azərbaycanı dünya çempionatında 11 boksçu təmsil edəcək

Dekabrın 3-13-də Birləşmiş Ərəb Əmirliklərinin Dubay şəhərində boks üzrə dünya çempionatı keçiriləcək.

Fortunamag.az xəbər verir ki, 120-dən çox ölkənin qatılacağı mundialda Azərbaycan millisi də mübarizə aparacaq.

Komandamızın baş məşqçisi Ravşan Xocayev yarışda 11 boksçuya şans verəcək. Dünya çempionatında Sübhan Mamedov (48 kiloqram), Nicat Hüseynov (51 kiloqram), Zəlimxan Süleymanov (54 kiloqram), Ümid Rüstəmov (57 kiloqram), Məhəmmədəli Aşurəliyev (60 kiloqram), Maqsud Xasmetov (63,5 kiloqram), Zaur Qəhrəmanov (67 kiloqram), Sərxan Əliyev (70 kiloqram), Səidcəmşid Səfərov (80 kiloqram), Alfonso Dominqes (86 kiloqram) və Məhəmməd Abdullayev (+92 kiloqram) rinqə çıxacaqlar.

Mundialda Fuad Aslanovla Rövşən Qədirov hakimlər sırasında yer alacaqlar. Milli komandaya rəhbərliyi isə Azərbaycan Boks Federasiyası İdarə Heyətinin üzvü Rövşən Hüseynov edəcək.

Fortunamag.az