Azərbaycan və Macarıstan Energetika İşçi Qrupunun 5-ci iclasını keçirib

Azərbaycan və Macarıstan energetika sahəsində əməkdaşlığı gücləndirir: Energetika İşçi Qrupunun 5-ci iclası onlayn formatda keçirilib.

İclasda işçi qrupun həmsədrləri – Azərbaycanın Energetika Nazirliyi aparatının rəhbəri Zaur Məmmədov və Macarıstan Xarici İşlər və Ticarət Nazirliyi Energetika və İqlim Diplomatiyası Departamentinin rəhbəri Isabella Feyerabend iştirak ediblər.

Zaur Məmmədov çıxışında vurğulayıb ki, işçi qrup iki ölkə arasında əməkdaşlığın inkişafına uğurla töhfə verir və energetika tərəfdaşlığı uzunmüddətli qarşılıqlı fəaliyyət nəticəsində strateji xarakter alıb. O, neft-qaz sahəsində əməkdaşlığın qarşılıqlı faydalı tərəfdaşlığa çevrildiyini qeyd edib və Azərbaycan və Macarıstan enerji şirkətləri arasındakı əlaqələri yüksək qiymətləndirib. Həmçinin, Macarıstanın Cənub Qaz Dəhlizi və Yaşıl Enerji Məsləhət Şuralarına, Bakı Enerji Həftəsinə qatılımı və COP29 hazırlıqlarında Azərbaycan təşəbbüslərinə dəstəyi xüsusi vurğulanıb.

İzabella Feyerabend çıxışında energetika sahəsində birgə layihələrin uğurlu inkişafını, infrastruktur imkanlarının əhəmiyyətini, “yaşıl” enerji və tənzimləmə sahəsində təcrübə mübadiləsini, həmçinin enerji səmərəliliyi sahəsində əməkdaşlığın genişlənmə perspektivlərini qeyd edib.

İclas çərçivəsində 4-cü iclasdan sonra görülən işlər, neft-qaz, bərpa olunan enerji, tənzimləmə və enerji səmərəliliyi sahəsində əməkdaşlıq barədə hesabatlar dinlənilib. Nəticədə Azərbaycan və Macarıstan arasında Energetika İşçi Qrupunun 5-ci iclasının protokolu imzalanıb.

Fortunamag.az