Azərbaycan şirkətinin ABŞ-da təqdimatı: Süni intellekt seysmik tədqiqatlarda tətbiq olundu

Azərbaycan şirkəti GL Group regionda ilk dəfə olaraq süni intellektdən istifadə etməklə “post-stack” seysmik məlumatların emalı texnologiyasını quruda yerləşən neft-qaz yataqlarında tətbiq edib. Bu nəticələr ABŞ-ın Hyuston şəhərində keçirilən IMAGE 2025 beynəlxalq konfransında təqdim olunub.

IMAGE 2025 geologiya və mühəndislik sahəsində dünyanın ən böyük illik forumudur. Tədbir SEG (Exploration Geophysicists Cəmiyyəti), AAPG (Amerika Neft Geoloqları Assosiasiyası) və SEPM (Sedimentologiya Cəmiyyəti) tərəfindən təşkil olunub. Bu il tədbirə 93 ölkədən 7,800-dən çox iştirakçı, 1,100-dən artıq elmi təqdimat, 260 sərgi iştirakçısı qatılıb.

GL Group nümayəndələri – Kənan Əliyev (Layihələrin idarəolunması direktoru) və Leyla İsmayılova (petrofizik) Kursəngi və Qarabağlı yataqlarında süni intellektin tətbiqi ilə bağlı təcrübələrini bölüşüblər. Onların sözlərinə görə, bu texnologiya əvvəllər tam işlənmiş hesab edilən yataqlarda yeni inkişaf imkanlarının aşkarlanmasına şərait yaradıb.

Layihə ABŞ-ın Waverity şirkəti ilə əməkdaşlıq çərçivəsində həyata keçirilib. Süni intellekt alqoritmləri mövcud seysmik məlumatların keyfiyyətini əhəmiyyətli dərəcədə artıraraq, ənənəvi üsullarla aşkar edilməyən daha dərin zonaların üzə çıxarılmasına imkan verib.

GL Group-un baş direktoru Asif Zeynalov vurğulayıb ki, əldə olunan nəticələr şirkətin yüksək texnologiyaların və rəqəmsal həllərin tətbiqi strategiyasını gücləndirir. Şirkət həmçinin öz təqdimat çərçivəsində tədqiqat və yataqların işlənməsi üzrə yeni təşəbbüsləri barədə texniki poster sessiyası da keçirib.

Fortunamag.az