ABŞ vəkili “Facebook”u məhkəməyə verib

ABŞ-da “Facebook”un qurucusu ilə eyni ada sahib vəkil Mark S. Zukerberq sosial şəbəkəni məhkəməyə verib. Fortunamag.az “BBC News”a istinadən xəbər verir ki, onun sözlərinə görə, hesabı dəfələrlə bağlanıb və o, “məşhuru təqlid etməkdə” əsassız ittiham olunub.

İndiana ştatında fəaliyyət göstərən vəkil son 8 ildə beş dəfə hesabının bağlandığını, bunun isə minlərlə dollar itirməsinə səbəb olduğunu bildirib. O, 38 ildir hüquqşünas işlədiyini və adının həqiqiliyini sübut etmək üçün şəxsiyyət vəsiqəsi, kredit kartları və fotolar təqdim etdiyini qeyd edib.

Vəkil deyir ki, Facebook ondan 11 min dollar dəyərində reklam pulu alıb, lakin reklamlar silinib. “Bu, elə bil billboard üçün pul verirsən, amma üstünü örtürlər”, – deyə o bildirib.

Meta şirkəti səhvi etiraf edərək onun hesabını bərpa edib və gələcəkdə bu kimi halların təkrarlanmaması üçün tədbirlər görüldüyünü açıqlayıb.

Fortunamag.az