Estoniyada Zəfər Gününə həsr olunmuş konsert təşkil edilib

Estoniyanın paytaxtı Tallin şəhərində Zəfər Gününün beşinci ildönümü münasibətilə konsert təşkil olunub. Tədbir Azərbaycanın Estoniyadakı səfirliyinin təşkilatçılığı ilə baş tutub.

Səfirlikdən Fortunamag.az bildirilib ki, mərasimdə Estoniya parlamentinin (Riigikogu) üzvləri, diplomatik korpusun rəhbərləri və nümayəndələri, ictimai-siyasi xadimlər, elm adamları, Azərbaycan və tatar icmalarının təmsilçiləri, eləcə də Tallin şəhərində təhsil alan gənc soydaşlarımız iştirak ediblər.

Tədbirdə Azərbaycanın Estoniyadakı səfiri Anar Məhərrəmov çıxış edərək Zəfər Gününün Azərbaycanın dövlətçilik tarixində xüsusi yer tutduğunu vurğulayıb. Diplomat qeyd edib ki, 8 Noyabr — Zəfər Günü Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə rəşadətli Azərbaycan Ordusunun ölkəmizin ərazilərini Ermənistanın 30 illik işğalından azad etməsinin, ədalətin və beynəlxalq hüququn bərqərar olmasının simvoludur.

Səfir diqqətə çatdırıb ki, Azərbaycanın müstəqilliyi xalqımızın ən böyük nailiyyətidir. “Konstitusiya və Suverenlik İli”ndə Zəfər Gününə həsr olunan tədbirlərin Azərbaycanın işğaldan azad edilmiş bütün suveren ərazilərində keçirilməsi xüsusilə qürurvericidir.

Tədbirin bədii hissəsində Üzeyir Hacıbəyli adına Bakı Musiqi Akademiyasının tələbəsi, klassik səs və opera ifaçısı Aysun Mahmudzadə, Estoniyanın Musiqi və Teatr Akademiyasında təhsil alan viola ifaçısı Əli Əmişov və pianoçu Jalə İslamova çıxış ediblər. Onların ifasında səslənən musiqi nömrələri tamaşaçılar tərəfindən alqışlarla qarşılanıb.

Fortunamag.az